ટંકારાના ડેમી-૨ ડેમના દરવાજા ખોલાશે: નીચાણવાળા વિસ્તારો અને કાંઠાના ગામોને સાવચેત રહેવા એલર્ટ

મોરબી જિલ્લાના ટંકારા તાલુકામાં નસીતપર ગામ પાસે આવેલા ડેમી-૨ સિંચાઈ યોજના (દરવાજાવાળો ડેમ)માંથી પાણી છોડવા અંગેની મહત્વની ચેતવણી આપતો સંદેશો જાહેર કરવામાં આવ્યો છે. ડેમી-૨ સિંચાઈ યોજનાના દરવાજા (રેડીયલ ગેટ) ખોલીને હેઠવાસમાં આવેલા ચેકડેમો ભરવા માટે કુલ ૮૦ એમ.સી.એફ.ટી. પાણી છોડવાની દરખાસ્તને ગુજરાત સરકારના નર્મદા અને જળસંપત્તિ વિભાગ તરફથી મંજૂરી મળી ગઈ છે. આ મંજૂરી મુજબ, તારીખ ૨૮/૦૯/૨૦૨૬ના રોજ સવારે ૧૦:૦૦ કલાકે ડેમના ૩ ગેટ ૨ ફુટ સુધી ખોલીને ૪૦૨૦ ક્યુસેક જેટલો પાણીનો પ્રવાહ નદીમાં છોડવામાં આવશે.

ડેમમાંથી પાણી છોડાવાનું હોવાથી નદીના પટમાં અવરજવર ન કરવા તેમજ કાંઠાના વિસ્તારોમાં સાવચેત રહેવા માટે તંત્ર દ્વારા કડક સૂચના આપવામાં આવી છે. આ એલર્ટના પગલે ટંકારા તાલુકાના નસીતપર, નાના રામપર અને મોટા રામપર; મોરબી તાલુકાના ચાંચાપર, ખાનપર, કોયલી, ધૂળકોટ, આમરણ, ડાયમંડનગર બેલા; તેમજ જામનગર જિલ્લાના જોડિયા તાલુકાના માવનુ ગામ જેવા નીચાણવાસના ગામોના લોકોને ખાસ એલર્ટ રહેવા અને નદીના પટથી દૂર રહેવા જણાવવામાં આવ્યું છે.