મોરબીમાં કામ બાબતે બોલાચાલી બાદ યુવક પર પાઈપ વડે હુમલો

મોરબીના બેલા ગામની સીમમાં આવેલી એકઝોટીકા સીરામીક ફેક્ટરીની લેબર કોલોનીમાં કામ બાબતે થયેલી નજીવી બોલાચાલીએ હિંસક રૂપ ધારણ કર્યું છે. સાથે રહેતા રૂમ પાર્ટનરે જ ઉશ્કેરાઈને યુવક પર લોખંડના પાઇપ વડે હિચકારો હુમલો કર્યો હોવાની ફરીયાદ નોંધાઈ છે.

મળતી માહિતી મુજબ, મૂળ ઉત્તરપ્રદેશના રાયબરેલીના વતની અને હાલ એક્ઝોટીકા સીરામીકમાં મજૂરીકામ કરતા નવિકાસકુમાર યાદવ (ઉ.વ. ૨૨) નાઈટ શિફ્ટ પૂરી કરીને પોતાના રૂમ પર હાજર હતા. તે દરમિયાન સાથે રહેતા અભિષેક યાદવે કારખાનામાં સરખી રીતે કામ કરવા બાબતે વાતચીત કરતા મામલો બીચક્યો હતો. અભિષેકે અચાનક ઉશ્કેરાઈને ગાળો ભાંડી ઢીકાપાટુનો માર માર્યો હતો અને ત્યારબાદ ત્યાં પડેલો લોખંડનો પાઇપ નવિકાસકુમારના માથામાં ફટકારી દીધો હતો. માથામાંથી લોહી નીકળવા લાગતા અને દેકારો થતાં હુમલાખોર અભિષેક ત્યાંથી ભાગી છૂટ્યો હતો.

આ ઘટના બાદ અન્ય રૂમ પાર્ટનરો અને કારખાનાના શેઠ હિતેશભાઈ દ્વારા ઈજાગ્રસ્ત યુવકને તાત્કાલિક હોસ્પિટલ મોરબી ખાતે ખસેડાયો હતો, જ્યાં તબીબોએ માથામાં ટાંકા આવ્યા હોવાનું અને નાનું ફ્રેક્ચર થયું હોવાનું જણાવ્યુ હતું. ઘટના અંગે મોડી મોરબી તાલુકા પોલીસને જાણ કરવામાં આવતા પોલીસે ગુનો નોંધી આગળની કાયદેસરની કાર્યવાહી હાથ ધરી છે.