વાંકાનેરના નવા ઢુવા ચોકી નજીક આવેલ ‘ઓમ સાંઈ સ્પા’માં પોલીસ ત્રાટકી, જાહેરનામા ભંગ બદલ કાર્યવાહી

વાંકાનેર તાલુકાના નવા ઢુવા ચોકી પાસે ભવાની હોટેલની બાજુમાં આવેલા ‘ઓમ સાંઈ સ્પા’ ઉપર વાંકાનેર તાલુકા પોલીસ દ્વારા પેટ્રોલિંગ દરમિયાન ચેકિંગ હાથ ધરવામાં આવ્યું હતું. આ ચેકિંગ દરમિયાન સ્પા સંચાલક દ્વારા સ્પામાં કામ કરતી વર્કરના બાયોડેટાના ફોર્મ ભરી પોલીસ સ્ટેશનમાં નોંધ ન કરાવી હોવાનું તેમજ સીસીટીવી કેમેરાના રિકોર્ડિંગ અંગેના જિલ્લા મેજીસ્ટ્રેટ મોરબીના જાહેરનામાનું પાલન ન કર્યું હોવાનું સામે આવ્યું હતું.

સ્પા સંચાલક જીગાભાઈ રામજીભાઈ ડાભીએ નિયમો વિરુદ્ધ જઈને કામ કરતી વ્યક્તિઓની નોંધણી ન કરાવી હોવાથી તથા સીસીટીવી ડેટા રાખવા બાબતના જાહેરનામાનો ભંગ કરેલ હોવાનું પંચો રૂબરૂ જણાઈ આવ્યું હતું. આ મામલે પોલીસે જરૂરી કાર્યવાહી હાથ ધરીને ભારતીય ન્યાય સંહિતા (બી.એન.એસ.) ની કલમ-૨૨૩ મુજબ જાહેરનામાના ભંગ બદલ ગુનો નોંધી આગળની કાર્યવાહી હાથ ધરી છે.