હળવદના હાઇવે પર સ્પાના ઓથા હેઠળ ચાલતા હાઇપ્રોફાઇલ કૂટણખાનાનો પર્દાફાશ

હળવદના રાણેકપર ચોકડી પાસે સ્પાના ઓથા હેઠળ ચાલતી અનૈતિક પ્રવૃત્તિનો પોલીસે પર્દાફાશ કરી ડમી ગ્રાહકની મદદથી દરોડો પાડ્યો હતો. કાર્યવાહી દરમિયાન સંચાલક ઝડપાયો, જ્યારે પોલીસે રૂ.35 હજારનો મુદ્દામાલ કબજે કરી વધુ તપાસ હાથ ધરી છે.

મળતી માહિતી મુજબ, હળવદ પોલીસને ચોક્કસ બાતમી મળી હતી કે રાણેકપર ચોકડી પાસે આવેલ વિશ્વાસ આર્કેડના બીજા માળે આવેલ ‘ટુ કેર લક્ઝરીયસ સ્પા’માં બહારના રાજ્યો અને જિલ્લાઓમાંથી લલનાઓને બોલાવીને બોડી મસાજના ઓથા હેઠળ ગ્રાહકો પાસેથી અસૂલ કરીને અનૈતિક દેહવ્યાપારનો અડ્ડો ચલાવવામાં આવી રહ્યો છે. આ બાતમીના આધારે પોલીસે ડમી ગ્રાહકોની મદદથી છટકું ગોઠવ્યું હતું. ડમી ગ્રાહક સ્પામાં પ્રવેશ્યા બાદ સંકેત મળતા જ પોલીસ કાફલાએ ત્રાટકીને દરોડો પાડ્યો હતો.

દરોડા દરમિયાન સ્પાના કૌંભાંડનો પર્દાફાશ થયો હતો. પોલીસે સ્થળ પરથી દેહવ્યાપાર ચલાવતા કૌશલ્યપૂર્વક સ્પા સંભાળતા સંચાલક રોહિતજી દલસંગજી વાઘેલા (રહે. હળવદ, મૂળ ડીસા)ને ઝડપી લીધો હતો, જ્યારે સ્પાનો મુખ્ય માલિક વિષ્ણુભાઈ પ્રતાપભાઈ ગોહરીયા (રહે. કારેલા, તા. લખતર) હાજર મળી આવ્યો ન હતો. પોલીસે ઘટનાસ્થળેથી રોકડા રૂપિયા, મોબાઇલ ફોન તેમજ અન્ય સામગ્રી મળી કુલ રૂ. ૩૫,૦૦૦/-નો મુદ્દામાલ જપ્ત કર્યો છે.

હળવદ પોલીસે આ મામલે ‘ધી ઇમોરલ ટ્રાફિક પ્રિવેન્શન એકટ-૧૯૫૬’ (ITPA) ની વિવિધ કલમો હેઠળ ગુનો નોંધી આગળની તપાસ હાથ ધરી છે. સ્પાના માલિકની ધરપકડ કરવા માટે પોલીસે ચક્રગતિમાન કર્યા છે અને આ નેટવર્કમાં અન્ય કોણ સંડોવાયેલું છે તે દિશામાં પણ ઊંડાણપૂર્વકની તપાસ શરૂ કરવામાં આવી છે.